Madridning “Real” klubi bosh murabbiyi Alvaro Arbeloa jamoa himoyachisi Dani Karvaxal bilan deyarli muloqot qilmayapti. Bu haqda El Chiringuito nashri xabar bermoqda.

Manbaga ko‘ra, “qirollik klubi” sardori o‘zini o‘yinlarga tayyor deb hisoblaydi. Biroq bosh murabbiy futbolchiga nega asosiy tarkibda maydonga tushmayotganini izohlab bermayapti. Qayd etilishicha, avvalroq OAVda Karvaxal hatto o‘yinoldi mashg‘ulotlarida ham ishtirok etmayotgani haqida ma’lumotlar paydo bo‘lgan.

Dani Karvaxal 2013-yildan buyon “Real” sharafini himoya qilib keladi. Shu vaqt davomida u barcha musobaqalar doirasida 436 ta uchrashuvda maydonga tushib, o‘z hisobiga 14 ta gol va 65 ta golli uzatma yozdirib qo‘ygan. Joriy mavsumda himoyachi madridliklar safida 10 ta o‘yinda ishtirok etgan.

Transfermarkt portali ma’lumotlariga ko‘ra, futbolchining transfer bahosi 7 million yevroni tashkil etadi. Karvaxalning “Real” bilan amaldagi shartnomasi 2026 yil 30 iyunga qadar mo‘ljallangan.