Abu-Dabida o‘tgan «Zenit» - «Dinamo» (1:0) uchrashuvidan keyin Rossiya klubi bosh murabbiyi Sergey Semak «Match TV» telekanali, «Zenit» hamda «Dinamo» klubi matbuot xizmatiga intervyu berdi.

Rossiyalik mutaxassis Sankt-Peterburg va Samarqand klublari o‘rtasidagi o‘yin asabiy va murosasiz o‘tgani, «Dinamo»ning o‘yini unga yoqqani haqida gapirib, O‘zbekiston milliy jamoasiga ham JCH-2026da omad tiladi. Semak «An-Nasr»dan taklif etilgan Jon Dyuran transferiga ham to‘xtaldi. Kolumbiyalik forvard «Dinamo» bilan o‘yinni stadiondan kuzatib bordi.

«Bu o‘yin futbolchilarimiz yig‘in davomida 90 daqiqadan harakat qilgan birinchi bahs bo‘ldi. Uchrashuvni jarohatlarsiz yakunlagani xursand qiladi. O‘yin sifati, intensivlik jihatdan ham yaxshi o‘tdi. Ba’zida jismoniy jihatdan kuch yetmagandek bo‘ldi, umuman olganda hammasi yaxshi. Bu qo‘pol o‘yin emas, jangovar, yakkakurashlarga boy bahs degan bo‘lardim. Ayni damda bu kerak.

«Dinamo» bilan o‘yin va jamoaning o‘zi menga yoqdi. Ancha tezkor va agressiv jamoa. Bunday bahslarda hisobga uncha e’tibor bermaslik kerak. Jamoa ancha yaxshi harakat qildi, agressiv o‘ynashga intildi. Tarkibidagi o‘yinchilar ham yaxshi darajada ekan. Jamoa darajasi ham yaxshi darajada ekanini ko‘rdik. Umuman olganda, o‘zbek klublari bilan har safar o‘yin o‘tkazishdan mamnunman. Har holda bu mamlakat bizga begona emas, JCH-2026da o‘yinlariga befarq bo‘lmaymiz, kuzatib boramiz», - dedi Sergey Semak o‘yindan keyin.