«Liverpul»da Arne Slotning kelajagi bilan bog‘liq vaziyat mavhumligicha qolmoqda.
«Touchline» nashri bergan ma’lumotlarga ko‘ra, «qizillar» rahbariyati niderlandiyalik mutaxassisdan Angliya Premyer-ligasidagi chempionlik poygasini unutib, bor e’tiborni Angliya Kubogi va Chempionlar Ligasidagi g‘alabaga qaratishni so‘ragan. Agar Slot ushbu turnirlarning hech birida zafar quchmasa, shuningdek, jamoaning keyingi mavsum uchun Chempionlar Ligasi yo‘llanmasini ta’minlay olmasa, joriy mavsum yakunida iste’foga chiqarilishi mumkin.
Hozirgi vaqtda «Liverpul» Angliya chempionati turnir jadvalida oltinchi o‘rinni egallab turibdi. Angliya Kubogida «qizillar» to‘rtinchi bosqichga yo‘l olishdi, Chempionlar Ligasida esa o‘z yurishlarini 1/8 finaldan davom ettirishadi.
