Italiya A Seriyasining 25-turi doirasidagi safar o‘yinida "Milan" "Piza"ni 2:1 hisobida minimal farq bilan mag‘lub etdi. Uchrashuv yakunlanganidan so‘ng "rossonerilar" ustozi Massimiliano Allegri o‘z fikrlarini bildirdi.
"Bu raqibga qarshi o‘ynash oson emas, bizga ancha qiyin bo‘ldi. "Milan" uch ochko bilan qaytmoqda, biroq bunday o‘yindan keyin biz albatta o‘z o‘yinimizni kuchaytirishimiz kerak. Biz o‘z maqsadimiz sari yana bir qadam yaqinlashdik", — deya 58 yoshli mutaxassisning so‘zlarini keltiradi DAZN.
Italiya chempionatining 24 turidan so‘ng (o‘yin o‘tkazilgan vaqtdagi holat) Allegri shogirdlari 53 ochko jamg‘arib, turnir jadvalida ikkinchi o‘rinda borishmoqda. Milan jamoasi peshqadam "Inter"dan besh ochko ortda qolmoqda.
