Milanning "Inter" klubi himoyachisi Yann-Aurel Bissekk A Seriya doirasida "Yuventus" ustidan qozonilgan g‘alabadan so‘ng (3:2) intervyu berdi.
"Neradzurrilar" ikkinchi bo‘lim davomida bir kishi ko‘p bo‘lib o‘ynab, bahs yakunida raqibni taslim etishga muvaffaq bo‘lishdi.
"Endi odamlar bizni to‘g‘ridan-to‘g‘ri raqobatchilarni mag‘lub eta olmaydi, deb gapirishni to‘xtatishadi. Bu gaplarni doimiy ravishda eshitish ancha yoqimsiz edi. Biz oldinga intilishimiz va kelajakka e’tibor qaratishimiz lozim. O‘yinimiz hali ideal darajada bo‘lmasa-da, bu juda muhim g‘alaba", — dedi Bissekk "DAZN" bilan suhbatda.
"Inter" turnir jadvalida peshqadamlik qilmoqda va "Milan"dan sakkiz ochko oldinda bormoqda, biroq "rossonerilar" ixtiyorida bitta zaxira o‘yini mavjud.
