"Bavariya" hujumchisi Xarri Keyn faoliyati davomida urilgan gollar sonini 500 taga yetkazib oldi.

Ingliz futbolchisi "Verder"ga qarshi kechgan bahsning 22-daqiqasida penaltini aniq amalga oshirib, raqib darvozasini ishg‘ol qildi, 25-daqiqada esa o‘yindan gol urdi. Hujumchining ikkinchi goli uning faoliyatidagi 500-si bo‘ldi. Ushbu ko‘rsatkichga erishish uchun Keynga bor-yo‘g‘i 743 ta o‘yin kifoya qildi — bu futbol tarixidagi eng yaxshi to‘purar Krishtianu Ronalduning natijasidan yaxshiroqdir. Ronaldu o‘zining 500-golini 753-uchrashuvida kiritgan edi. Bu marrani Lionel Messi (632) va Robert Levandovski (734) yanada tezroq zabt etishgan.

Xarri Keyn 2023 yildan beri "Bavariya" sharafini himoya qilib kelmoqda. Bunga qadar u o‘zi uchun qadrdon bo‘lgan "Tottenxem" safida harakat qilgan.