«Arsenal»ning hujumkor yarim himoyachisi Martin Edegor yozgi transfer oynasida jamoani tark etishi mumkin. Bu haqda Topskills Sports UK xabar bermoqda.

Manba bergan ma’lumotga ko‘ra, 27 yoshli norvegiyalik futbolchi o‘z agentidan «Manchester Yunayted» bilan muzokaralarni boshlashni so‘ragan. Yarim himoyachi «Arsenal»da o‘zini yetarlicha qadrlanmayotgandek his qilmoqda va bosh murabbiy Mikel Arteta bilan munosabatlari murakkab bo‘lgani uchun ketishga tayyor. Qayd etilishicha, Edegorga «Bavariya» tomonidan ham qiziqish bor, biroq futbolchining o‘zi Angliyada qolishni afzal ko‘rmoqda.

Joriy mavsumda Edegor barcha turnirlarda 26 ta o‘yinda ishtirok etib, bitta gol urdi va oltita golli uzatmaga mualliflik qildi.