«Арсенал»нинг ҳужумкор ярим ҳимоячиси Мартин Эдегор ёзги трансфер ойнасида жамоани тарк этиши мумкин. Бу ҳақда Topskills Sports UK хабар бермоқда.
Манба берган маълумотга кўра, 27 ёшли норвегиялик футболчи ўз агентидан «Манчестер Юнайтед» билан музокараларни бошлашни сўраган. Ярим ҳимоячи «Арсенал»да ўзини етарлича қадрланмаётгандек ҳис қилмоқда ва бош мураббий Микель Артета билан муносабатлари мураккаб бўлгани учун кетишга тайёр. Қайд этилишича, Эдегорга «Бавария» томонидан ҳам қизиқиш бор, бироқ футболчининг ўзи Англияда қолишни афзал кўрмоқда.
Жорий мавсумда Эдегор барча турнирларда 26 та ўйинда иштирок этиб, битта гол урди ва олтита голли узатмага муаллифлик қилди.
