«Real» hujumchisi Kilian Mbappe «Benfika»ga qarshi o‘yinda maydonga tushishi mumkin.

Fransiyalik yulduz La Liganing shanba kungi «Real Sosyedad»ga qarshi bahsini (4:1) o‘tkazib yuborgan edi. Avvalroq Mbappe dekabr oyi oxirida olgan jarohati sababli tizzasida noqulaylik his qilayotgani xabar qilingandi.

Marca nashrining yozishicha, bugungi mashg‘ulotlarda Mbappe umumiy guruhda ishtirok etgan. «Sosyedad» bilan o‘yinda qatnashgan futbolchilar esa tiklanish mashqlarini bajarishdi; kechagi bahsda hech kim jarohat olmagan.

Shuningdek, seshanba kuni Chempionlar ligasi doirasidagi «Benfika»ga qarshi o‘yinda jarohatidan tiklanishda davom etayotgan Jud Bellingem, Eder Militao va Rodrigo aniq maydonga tushmasligi xabar qilinmoqda.