Rimning "Roma" klubi sobiq sardori Franchesko Totti o‘z vaqtida portugaliyalik mutaxassis Joze Mourinyo bilan birga ishlamaganidan afsusda ekanini tan oldi. Mourinyo yaqindagina Rim klubini boshqargan edi, biroq Totti faoliyatini 2017 yildayoq yakunlagani sababli ularning yo‘llari maydonda kesishmadi.
"Menimcha, Mourinyo qo‘l ostida o‘zimni maksimal darajada ko‘rsata olgan bo‘lardim. Chunki menga uning ochiqko‘ngil inson ekani va futbolchilarga maydonda zavqlanib o‘ynashga imkon berishi haqida aytishgandi. U jamoani a’lo darajada boshqaradi. Tarkibingda shuncha ko‘p mashhur futbolchilar bo‘lganida, ularni shunchaki mashq qildirish emas, balki boshqara olish muhimdir", — deya Tottining so‘zlarini keltiradi fcinter1908.it nashri.
Eslatib o‘tamiz, hozirda "Roma" A Seriya turnir jadvalida beshinchi o‘rinda bormoqda.
