«Monako» ustozi Sebastyen Pokonyoli jamoaning rossiyalik yarim himoyachisi Aleksandr Golovinning «PSJ»ga qarshi kechgan bahsdagi chetlatilishi haqida fikr bildirdi.
Eslatib o‘tamiz, Chempionlar ligasi pley-off bosqichining ilk uchrashuvi monegasklarning 2:3 hisobidagi mag‘lubiyati bilan yakunlandi. Golovin asosiy tarkibda maydonga tushdi, biroq ikkinchi bo‘lim boshidayoq qizil kartochka olib, maydonni tark etdi. Bu rossiyalik futbolchi uchun ketma-ket qayd etilgan ikkinchi chetlatish bo‘ldi.
«Men hafsalam pir bo‘lganini yashirmayman. Bu nafaqat qizil kartochka tufayli, balki o‘yin qanday ko‘rinish olgani bilan ham bog‘liq. Biz bunday darajadagi o‘yinda bir kishi kam bo‘lib qolishga yo‘l qo‘ya olmaymiz. Shusiz ham Chempionlar ligasi pley-offida ko‘plab yo‘qotishlar bilan o‘ynayapmiz», — dedi Pokonyoli jurnalistlarga.
Joriy mavsumda Golovin barcha musobaqalarda 26 ta o‘yin o‘tkazib, ikkita gol urdi va beshta golli uzatmani o‘z hisobiga yozdirib qo‘ydi.
