«Монако» устози Себастьен Поконьоли жамоанинг россиялик ярим ҳимоячиси Александр Головиннинг «ПСЖ»га қарши кечган баҳсдаги четлатилиши ҳақида фикр билдирди.
Эслатиб ўтамиз, Чемпионлар лигаси плей-офф босқичининг илк учрашуви монегаскларнинг 2:3 ҳисобидаги мағлубияти билан якунланди. Головин асосий таркибда майдонга тушди, бироқ иккинчи бўлим бошидаёқ қизил карточка олиб, майдонни тарк этди. Бу россиялик футболчи учун кетма-кет қайд этилган иккинчи четлатиш бўлди.
«Мен ҳафсалам пир бўлганини яширмайман. Бу нафақат қизил карточка туфайли, балки ўйин қандай кўриниш олгани билан ҳам боғлиқ. Биз бундай даражадаги ўйинда бир киши кам бўлиб қолишга йўл қўя олмаймиз. Шусиз ҳам Чемпионлар лигаси плей-оффида кўплаб йўқотишлар билан ўйнаяпмиз», — деди Поконьоли журналистларга.
Жорий мавсумда Головин барча мусобақаларда 26 та ўйин ўтказиб, иккита гол урди ва бешта голли узатмани ўз ҳисобига ёздириб қўйди.
