Avstraliya futbol ligalari Ramazon oyi davomida futbolchilar va hakamlarni qo‘llab-quvvatlashga tayyor ekanliklarini ma’lum qilishdi.

2023/24 yilgi mavsumda joriy etilgan qoidaga ko‘ra, klublar va hakamlar quyosh botganidan so‘ng futbolchilar tamaddu qilib olishlari uchun 90 soniyalik maxsus tanaffus so‘rashlari mumkin. Bunda so‘rovnoma o‘yin boshlanishidan 90 daqiqa oldin taqdim etilishi va unda ro‘za tutayotgan futbolchilarning ism-sharifi ko‘rsatilishi lozim.

«Ramazon — ko‘plab futbolchilar, muxlislar va hakamlar uchun muhim bayram. Ushbu siyosat ro‘za tutayotgan ishtirokchilarning salomatligini ta’minlash uchun zarur bo‘lib, har bir inson o‘zini o‘yinning bir qismi deb his qiladigan muhit yaratishga bo‘lgan intilishimizni ifodalaydi», — dedi A-Leagues bosh direktori Stiv Rosich.

Avstraliya professional futbolchilar assosiasiyasi bosh direktori Bo Bush shunday qo‘shimcha qildi: «Biz futbolchilar, avvalo, inson ekanligini e’tirof etuvchi tashabbuslarni doimo qo‘llab-quvvatlaymiz. Maqsadimiz — barcha o‘yinchilar ligada o‘zlarini hurmat va qo‘llov ostida his qilishlarini ta’minlashdir».