Австралия футбол лигалари Рамазон ойи давомида футболчилар ва ҳакамларни қўллаб-қувватлашга тайёр эканликларини маълум қилишди.
2023/24 йилги мавсумда жорий этилган қоидага кўра, клублар ва ҳакамлар қуёш ботганидан сўнг футболчилар тамадду қилиб олишлари учун 90 сониялик махсус танаффус сўрашлари мумкин. Бунда сўровнома ўйин бошланишидан 90 дақиқа олдин тақдим этилиши ва унда рўза тутаётган футболчиларнинг исм-шарифи кўрсатилиши лозим.
«Рамазон — кўплаб футболчилар, мухлислар ва ҳакамлар учун муҳим байрам. Ушбу сиёсат рўза тутаётган иштирокчиларнинг саломатлигини таъминлаш учун зарур бўлиб, ҳар бир инсон ўзини ўйиннинг бир қисми деб ҳис қиладиган муҳит яратишга бўлган интилишимизни ифодалайди», — деди A-Leagues бош директори Стив Росич.
Австралия профессионал футболчилар ассоциацияси бош директори Бо Буш шундай қўшимча қилди: «Биз футболчилар, аввало, инсон эканлигини эътироф этувчи ташаббусларни доимо қўллаб-қувватлаймиз. Мақсадимиз — барча ўйинчилар лигада ўзларини ҳурмат ва қўллов остида ҳис қилишларини таъминлашдир».
