O‘zbekiston terma jamoasi sobiq himoyachisi Vitaliy Denisov o‘zbekistonliklarning Rossiya terma jamoasi bilan o‘rtoqlik uchrashuvini ko‘rish istagini bildirdi.
"Bu har ikki jamoa uchun ajoyib o‘yin bo‘ladi. O‘zbekiston uchun bu juda yaxshi raqib. Rossiyada ham, O‘zbekistonda ham stadion to‘la bo‘lardi. Axir O‘zbekiston jahon chempionatida o‘ynaydi", - deya Denisovning so‘zlarini keltiradi Metaratings.ru.
4 yil avval O‘zbekiston va Rossiya ilk bor o‘zaro o‘yin o‘tkazgandi. O‘shanda Toshkentdagi "Paxtakor" arenasida bo‘lib o‘tgan o‘rtoqlik o‘yiniga 14 mingdan sal ko‘proq tomoshabin yig‘ilgandi.
Rossiya terma jamoasi 2022 yildan boshlab xalqaro musobaqalarda ishtirok etish imkoniyatidan mahrum etildi. Jamoa o‘rtoqlik uchrashuvlarini o‘tkazish bilan cheklanishga majbur.













