Madridning «Atletiko» klubi bosh murabbiyi Diyego Simeone jamoasining Chempionlar ligasi 1/8 finaliga yo‘l olganiga munosabat bildirdi. Pley-off bosqichida «matraschilar» «Bryugge» bilan to‘qnash kelishdi. Jamoalar o‘rtasidagi dastlabki o‘yin 3:3 hisobida yakunlangan bo‘lsa, ikkinchi bahsda Ispaniya klubi raqibini 4:1 hisobida mag‘lub etdi. Endi 1/8 final bosqichida «Atletiko» «Liverpul» yoki «Tottenxem» jamoalaridan biriga qarshi maydonga tushadi.
«Jamoamiz hozircha «Liverpul» yoki «Tottenxem» haqida o‘ylayotgani yo‘q. Biz bugungi g‘alabadan zavqlanyapmiz. 1/8 finalga chiqish biz uchun juda muhim. Ko‘ramiz, o‘yinimizni yanada yaxshilab, bundan ham uzoqroqqa bora olarmikanmiz. Shuncha o‘yin o‘tkazgan yigitlarning harakatini yuqori baholayman», — deya Simeonening so‘zlaridan iqtibos keltirmoqda «AS» nashri.
