Мадриднинг «Атлетико» клуби бош мураббийи Диего Симеоне жамоасининг Чемпионлар лигаси 1/8 финалига йўл олганига муносабат билдирди. Плей-офф босқичида «матрасчилар» «Брюгге» билан тўқнаш келишди. Жамоалар ўртасидаги дастлабки ўйин 3:3 ҳисобида якунланган бўлса, иккинчи баҳсда Испания клуби рақибини 4:1 ҳисобида мағлуб этди. Энди 1/8 финал босқичида «Атлетико» «Ливерпуль» ёки «Тоттенхэм» жамоаларидан бирига қарши майдонга тушади.

«Жамоамиз ҳозирча «Ливерпуль» ёки «Тоттенхэм» ҳақида ўйлаётгани йўқ. Биз бугунги ғалабадан завқланяпмиз. 1/8 финалга чиқиш биз учун жуда муҳим. Кўрамиз, ўйинимизни янада яхшилаб, бундан ҳам узоқроққа бора олармиканмиз. Шунча ўйин ўтказган йигитларнинг ҳаракатини юқори баҳолайман», — дея Симеоненинг сўзларидан иқтибос келтирмоқда «AS» нашри.