UFC tashkiloti AQSH poytaxti Vashington shahridagi Oq uyda turnir tashkil etish uchun 60 million dollargacha mablag‘ sarflaydi. Bu haqda MMA Fighting portali xabar berdi.
Oq uydagi turnirni o‘tkazish uchun UFC bino janubidagi maysazorda oktagon va tomoshabinlar uchun tribunalar barpo etadi. Jangchilar oktagonga Oq uy kabinetlari orqali chiqib kelishi kutilmoqda.
Avvalroq UFC prezidenti Dana Uayt Paramount UFC YouTube kanaliga bergan intervyusida ushbu tadbir tashkilot tarixidagi eng ko‘p tomosha qilinadigan turnir bo‘lishini aytib o‘tgan edi.
MMA olamida 2026-yilning eng muhim voqealaridan biri bo‘lishi kutilayotgan ushbu musobaqa 14-iyun kuni tashkil etiladi. Ramziy ma’noda, aynan shu kuni AQSH prezidenti Donald Tramp 80 yoshga to‘ladi.
Dastlab rasmiy manbalarda turnir AQSH mustaqilligining 250 yilligi munosabati bilan 4-iyul sanasiga rejalashtirilgani qayd etilgan edi. Biroq logistika masalalari inobatga olinib, tadbir 14-iyun sanasiga ko‘chirildi.
AQSH prezidenti Donald Trampning ta’kidlashicha, Oq uy qarshisida quriladigan arenaga 100 ming nafargacha tomoshabin tashrif buyurishi mumkin. Bu Oq uy hududida o‘tkaziladigan tarixdagi ilk professional sport tadbiri sifatida yilnomalardan joy oladi.
