Turkiya prezidenti Rejep Tayip Erdo‘g‘an «Galatasaroy» jamoasini Chempionlar ligasi 1/8 finaliga chiqqani bilan tabrikladi. Istanbul klubi ikki o‘yin natijasiga ko‘ra «Yuventus»dan ustun keldi (5:2, 2:3).
Turkiya yoshlar va sport vaziri Osman Ashkin Bak kechagi o‘yindan so‘ng kiyinish xonasida jamoa bilan uchrashdi hamda futbolchilar va murabbiylar shtabini tabrikladi.
Shuningdek, Erdo‘g‘an jamoa bosh murabbiyi Okan Buruk bilan telefon orqali muloqot qildi.
«Galatasaroy» keyingi bosqichga chiqdi. Bu mamlakatimiz uchun chindan ham katta yutuq», — dedi Turkiya prezidenti.
«Biz ham juda xursandmiz. Prezident janoblari, bu siz uchun tug‘ilgan kun sovg‘asi bo‘lsin», — deya javob qaytardi Buruk.
Bugun Erdo‘g‘an 72 yoshni qarshi oldi.
