Vinisius Juniorning madridlik «Real»dagi faoliyatini davom ettirishi jamoadagi tarkibiy o‘zgarishlar va taktik qayta qurishlarga bog‘liq bo‘lishi mumkin. Bu haqda «El Nacional» nashri xabar bermoqda.
Futbolchi klub rahbariyatiga shuni tushuntirdiki, uning Madridda qolishi faqatgina o‘z o‘yin ambisiyalari va uslubiga mos keladigan chuqur tarkibiy islohotlar amalga oshirilgan taqdirdagina mumkin.
Xabar qilinishicha, Vinisius jamoa hujum chizig‘ining so‘zsiz yetakchisiga aylanishni niyat qilgan. Buning uchun, uning fikricha, hujumdagi rollar taqsimotini, ayniqsa Rodrigo bilan raqobat tufayli imkoniyatlari cheklanib qolayotgan chap qanotdagi vaziyatni qayta ko‘rib chiqish zarur. Shu bilan birga, braziliyalik futbolchi yosh hujumchi Endrik Felipening tarkibga kiritilishi orqali hujum chizig‘i kuchayishini ijobiy baholamoqda.
Bundan tashqari, manbaning xabariga ko‘ra, Vinisius klub oldiga qo‘yilgan vazifalar darajasida yetarlicha foyda keltirmayotgan bir qator futbolchilar bilan xayrlashishni zarur deb hisoblaydi. Bunday futbolchilar qatorida David Alaba, Dani Sebalyos va Fran Garsiya nomlari tilga olingan.
Vini 2018 yildan beri «Real» sharafini himoya qilib kelmoqda va bu vaqt ichida jamoaning asosiy o‘yinchilaridan biriga aylandi. Madrid klubi tarkibida u 10 dan ortiq sovrinlarni qo‘lga kiritdi, jumladan, ikki bor Chempionlar ligasi, uch bora La Liga g‘olibligi, shuningdek, UEFA Superkubogi, Klublar o‘rtasidagi jahon chempionati va Ispaniya Kubogida zafar quchgan.
