«Santos» futbolchisi Neymar Braziliya chempionatidagi golini Vinisius Junior uslubida nishonladi.
34 yoshli hujumchi «Vasko da Gama»ga qarshi bahsda dubl qayd etdi va «Santos»ning 2:1 hisobidagi g‘alabasini ta’minladi. O‘yindan so‘ng futbolchi nima uchun Vinisiusning raqsini takrorlashga qaror qilganini tushuntirib berdi.
«Bu Vini uchun. U Portugaliyada «Benfika» darvozasiga gol urganidan keyin men unga shunday degandim: agar «Bernabeu»da ham gol ursang, shu ishni takrorla, men ham gol urganimda seni qo‘llab-quvvatlayman», — deya Neymarning so‘zlarini keltirmoqda Madrid Xtra.
Eslatib o‘tamiz, Vinisiusning o‘sha raqsi anchagina shov-shuv va e’tirozlarga sabab bo‘lgan edi: «Benfika» vakillari buni provokasiya sifatida qabul qilishgan, Lissabon klubi ustozi Joze Mourinyo esa «qaymoqranglilar» yulduzining xatti-harakatidan ochiqchasiga noroziligini bildirgan edi.
