«Сантос» футболчиси Неймар Бразилия чемпионатидаги голини Винисиус Жуниор услубида нишонлади.

34 ёшли ҳужумчи «Васко да Гама»га қарши баҳсда дубль қайд этди ва «Сантос»нинг 2:1 ҳисобидаги ғалабасини таъминлади. Ўйиндан сўнг футболчи нима учун Винисиуснинг рақсини такрорлашга қарор қилганини тушунтириб берди.

«Бу Вини учун. У Португалияда «Бенфика» дарвозасига гол урганидан кейин мен унга шундай дегандим: агар «Бернабеу»да ҳам гол урсанг, шу ишни такрорла, мен ҳам гол урганимда сени қўллаб-қувватлайман», — дея Неймарнинг сўзларини келтирмоқда Madrid Xtra.

Эслатиб ўтамиз, Винисиуснинг ўша рақси анчагина шов-шув ва эътирозларга сабаб бўлган эди: «Бенфика» вакиллари буни провокация сифатида қабул қилишган, Лиссабон клуби устози Жозе Моуриньо эса «қаймоқранглилар» юлдузининг хатти-ҳаракатидан очиқчасига норозилигини билдирган эди.