"Aston Villa" hujumchisi Morgan Rodjers Angliya chempionatining 28-turida "Vulverxempton"dan qabul qilingan mag‘lubiyatga (0:2) munosabat bildirdi.
"Juda xafaman. Vaziyatlar yaratish va gol urish uchun yetarlicha harakat qilmadik. O‘yinning ayrim qismlarini nazorat qildik, hammasi ham yomon emas edi, lekin vaziyatlar yaratishda oqsadik.
Jadvaldagi o‘rnimiz bizga bosim o‘tkazyaptimi? Ha, lekin bunday bo‘lmasligi kerak. Biz turnir jadvalida munosib tarzda yuqori o‘rinda turibmiz va buni unutmasligimiz lozim. Oxirgi o‘yinlar seriyamiz odatdagidek yaxshi emas, lekin bu — APLdagi kurash. Biz g‘alabali seriyamizga qaytish niyatidamiz. Jarohatlar — bu bahona bo‘lolmaydi. Biz har bir o‘yinda g‘alaba qozonishga intilamiz va hali ham turnir jadvalida uchinchi o‘rindamiz. Bu biz bo‘lishni istagan joy. Biz o‘z oldimizga yuqori maqsadlarni qo‘yganmiz va har bir o‘yinda g‘alaba qozonishga qodirmiz", — deya Rodjersning so‘zlarini keltiradi BBC.
"Vulverxempton" 3 yanvardan beri APLdagi ilk g‘alabasini qo‘lga kiritdi va 13 ochko bilan turnir jadvalida so‘nggi o‘rinni egallab turibdi. "Aston Villa" esa 51 ochko bilan 3-pog‘onada bormoqda.
