"Napoli" bosh murabbiyi Antonio Konte jamoa joriy mavsumda duch kelgan qiyinchiliklar haqida o‘z fikrlari bilan o‘rtoqlashdi. Italiyaning amaldagi chempionlari mavsum boshidanoq jarohatlar tufayli aziyat chekmoqda.
Neapolliklar allaqachon Chempionlar ligasi va Italiya Kubogini tark etishdi, shuningdek, A Seriya chempionlik poygasida peshqadam "Inter"ga qarshilik ko‘rsatishlari dargumon bo‘lib turibdi.
"Bu mavsumda men juda ko‘p yangi tajriba orttirdim, chunki ilgari duch kelmagan vaziyatlarga duch keldim. Bu meni murabbiy sifatida yanada kuchli qiladi — bu kabi barcha muammolarni hal qilish juda qiyin. Hozir o‘zimni har qachongidan ham mukammalroq murabbiydek his qilyapman", — deya Kontening so‘zlarini keltiradi jurnalist Nikolo Skira.
Shanba kuni "Napoli" safarda "Verona"ni (2:1) mag‘lub etgan edi.
