"Наполи" бош мураббийи Антонио Конте жамоа жорий мавсумда дуч келган қийинчиликлар ҳақида ўз фикрлари билан ўртоқлашди. Италиянинг амалдаги чемпионлари мавсум бошиданоқ жароҳатлар туфайли азият чекмоқда.
Неаполликлар аллақачон Чемпионлар лигаси ва Италия Кубогини тарк этишди, шунингдек, А Серия чемпионлик пойгасида пешқадам "Интер"га қаршилик кўрсатишлари даргумон бўлиб турибди.
"Бу мавсумда мен жуда кўп янги тажриба орттирдим, чунки илгари дуч келмаган вазиятларга дуч келдим. Бу мени мураббий сифатида янада кучли қилади — бу каби барча муаммоларни ҳал қилиш жуда қийин. Ҳозир ўзимни ҳар қачонгидан ҳам мукаммалроқ мураббийдек ҳис қиляпман", — дея Контенинг сўзларини келтиради журналист Николо Скира.
Шанба куни "Наполи" сафарда "Верона"ни (2:1) мағлуб этган эди.
