FIFA prezidenti Janni Infantino raqiblari bilan to‘qnashuv paytida og‘zini qo‘li bilan yopib gapiradigan futbolchilarni maydondan chetlatishni zarur deb hisoblaydi.

«Agar o‘yinchi og‘zini yopib, irqchilik mazmunidagi biron bir gap aytsa, u shubhasiz maydondan haydalishi kerak. U aytish mumkin bo‘lmagan gapni aytgan deb taxmin qilish lozim, aks holda og‘zini yopishiga hojat qolmasdi», — deya Infantinoning so‘zlaridan iqtibos keltirmoqda «Sky News».

FIFA rahbarining fikricha, bu kabi choralar sportdagi irqchilikka qarshi kurashga jiddiy yondashilayotganining ko‘rsatkichi bo‘ladi. Shuningdek, u xatoga yo‘l qo‘ygan futbolchilarga uzr so‘rash imkoniyatini ham berish kerakligini ta’kidladi.

«G‘azab ustida inson keyinchalik pushaymon bo‘ladigan ishlarni qilib qo‘yishi mumkin. Bunday hollarda sanksiya boshqacharoq bo‘lishi lozim. Biz oldinga qadam tashlashimiz va ehtimol, bu haqda ham o‘ylab ko‘rishimiz kerak», — deya qo‘shimcha qildi Infantino.