Italiya chempionatining 27-turi "Roma" uchun unchalik muvaffaqiyatli kechmagan bo‘lsa, Rimning boshqa bir klubi — "Lasio" uchun mutlaqo omadsiz yakunlandi. Maurisio Sarri shogirdlari safarda joriy mavsumda inqirozga yuz tutayotgan "Torino"ga imkoniyatni boy berishdi (vaholanki, turinliklar "Lasio" bilan o‘yingacha bo‘lgan so‘nggi beshta bahsda o‘z darvozalaridan 13 ta to‘p olib chiqishgan edi). "Burgutlar" ustozi o‘yindan so‘ng o‘z fikrlarini bildirdi.
"Biz asabiy taranglik oqibatida mag‘lub bo‘ldik, raqibda ijodiy va ijobiy energiya ko‘proq edi. Biz qaytgan to‘plar uchun kurashda sustlik qildik. Menimcha, bu juda ko‘p narsani anglatuvchi ko‘rsatkichdir. Shu bilan birga, statistika bizda golli vaziyatlar ko‘proq bo‘lganini ko‘rsatmoqda, lekin u aldamoqda, chunki raqibning imkoniyatlari ancha xavfliroq va kutilmaganda yuzaga keldi", — deya Sarrining so‘zlarini cittaceleste.it nashri keltirmoqda.
Ushbu mag‘lubiyat natijasida "Lasio" A Seriya turnir jadvalida 10-o‘ringa tushib ketdi.
