Италия чемпионатининг 27-тури "Рома" учун унчалик муваффақиятли кечмаган бўлса, Римнинг бошқа бир клуби — "Лацио" учун мутлақо омадсиз якунланди. Маурицио Сарри шогирдлари сафарда жорий мавсумда инқирозга юз тутаётган "Торино"га имкониятни бой беришди (ваҳоланки, туринликлар "Лацио" билан ўйингача бўлган сўнгги бешта баҳсда ўз дарвозаларидан 13 та тўп олиб чиқишган эди). "Бургутлар" устози ўйиндан сўнг ўз фикрларини билдирди.
"Биз асабий таранглик оқибатида мағлуб бўлдик, рақибда ижодий ва ижобий энергия кўпроқ эди. Биз қайтган тўплар учун курашда сустлик қилдик. Менимча, бу жуда кўп нарсани англатувчи кўрсаткичдир. Шу билан бирга, статистика бизда голли вазиятлар кўпроқ бўлганини кўрсатмоқда, лекин у алдамоқда, чунки рақибнинг имкониятлари анча хавфлироқ ва кутилмаганда юзага келди", — дея Саррининг сўзларини cittaceleste.it нашри келтирмоқда.
Ушбу мағлубият натижасида "Лацио" А Серия турнир жадвалида 10-ўринга тушиб кетди.
