Ayblov tomoni "Barselona" hujumchisi Markus Reshfordga nisbatan irqchilik ruhidagi haqoratlar qilishda ayblanayotgan 2007 yilda tug‘ilgan "Ovyedo" muxlisi uchun 1 yil-u 3 oylik qamoq jazosini so‘radi, deb xabar bermoqda COPE.
25 sentyabr kuni "Barselona" safarda "Real Ovyedo"ni 3:1 hisobida mag‘lub etgan edi. O‘yin vaqtida mezbonlarning muxlislaridan biri mehmonlarning ingliz hujumchisini qora tanlilar uchun kamsituvchi "negrata" deb haqorat qilgan.
Haqorat Reshford burchak to‘pini amalga oshirishga tayyorlanayotgan vaqtda yangragan. Ushbu holat videoga muhrlanib, internetda tarqalib ketgan. Qayd etilishicha, ushbu video 24 soat ichida turli ijtimoiy tarmoqlar orqali 28 894 400 marta tomosha qilingan.
Prokuratura sodir bo‘lgan voqeani irqchilik negizida inson qadr-qimmatiga qarshi jinoyat hamda ma’naviy daxlsizlikka qarshi jinoyatlar majmui sifatida tavsiflamoqda. Qamoq jazosidan tashqari, aybdordan 2 880 yevro miqdorida jarima undirish, saylov huquqidan mahrum qilish, to‘rt yil davomida ta’lim, sport va dam olish sohalarida faoliyat yuritishni taqiqlash, shuningdek, futbolchiga ma’naviy zarar uchun 2 000 yevro tovon puli to‘lash so‘ralgan.
Muqobil variant sifatida, agar sud javobgarni faqat ma’naviy daxlsizlikka tajovuz qilish moddasi bo‘yicha aybdor deb topsa, prokuratura xuddi shu muddatga ozodlikdan mahrum qilish va besh yil davomida futbol o‘yinlariga tashrif buyurishni taqiqlashni so‘ramoqda.
