Айблов томони "Барселона" ҳужумчиси Маркус Рэшфордга нисбатан ирқчилик руҳидаги ҳақоратлар қилишда айбланаётган 2007 йилда туғилган "Овьедо" мухлиси учун 1 йил-у 3 ойлик қамоқ жазосини сўради, деб хабар бермоқда COPE.
25 сентябрь куни "Барселона" сафарда "Реал Овьедо"ни 3:1 ҳисобида мағлуб этган эди. Ўйин вақтида мезбонларнинг мухлисларидан бири меҳмонларнинг инглиз ҳужумчисини қора танлилар учун камситувчи "negrata" деб ҳақорат қилган.
Ҳақорат Рэшфорд бурчак тўпини амалга оширишга тайёрланаётган вақтда янграган. Ушбу ҳолат видеога муҳрланиб, интернетда тарқалиб кетган. Қайд этилишича, ушбу видео 24 соат ичида турли ижтимоий тармоқлар орқали 28 894 400 марта томоша қилинган.
Прокуратура содир бўлган воқеани ирқчилик негизида инсон қадр-қимматига қарши жиноят ҳамда маънавий дахлсизликка қарши жиноятлар мажмуи сифатида тавсифламоқда. Қамоқ жазосидан ташқари, айбдордан 2 880 евро миқдорида жарима ундириш, сайлов ҳуқуқидан маҳрум қилиш, тўрт йил давомида таълим, спорт ва дам олиш соҳаларида фаолият юритишни тақиқлаш, шунингдек, футболчига маънавий зарар учун 2 000 евро товон пули тўлаш сўралган.
Муқобил вариант сифатида, агар суд жавобгарни фақат маънавий дахлсизликка тажовуз қилиш моддаси бўйича айбдор деб топса, прокуратура худди шу муддатга озодликдан маҳрум қилиш ва беш йил давомида футбол ўйинларига ташриф буюришни тақиқлашни сўрамоқда.
