«Milan» yarim himoyachisi Luka Modrich og‘ir jarohat olgan sobiq jamoadoshi Rodrigoga murojaat yo‘lladi.

Seshanba kuni ma’lum bo‘lishicha, braziliyalik futbolchi tizzasidagi xochsimon boylamlar uzilishi sababli jahon chempionatini o‘tkazib yuboradi.

«Tezroq sog‘ayib ket, o‘g‘lim. Sen albatta yanada kuchli bo‘lib qaytasan», — deb yozdi 41 yoshli xorvatiyalik futbolchi ijtimoiy tarmoqlardagi sahifasida.

Ehtimol, Rodrigo kuzgacha maydonga tusha olmaydi. Joriy mavsumda 25 yoshli hujumchi «qaymoqranglilar» safida barcha musobaqalarda 27 ta o‘yinda ishtirok etib, 3 ta gol urdi va 6 ta golli uzatmani amalga oshirdi.

Luka Modrich «Real» sharafini 13 yil davomida himoya qilgan. Yarim himoyachi o‘tgan yilning yozida Madrid grandi safini tark etgan edi.