Ispaniyalik sobiq hujumchi David Vilya Lionel Messi haqida nimalar deb o‘ylashini so‘zlab berdi.

Ispaniyalik va argentinalik futbolchilar 2010 yildan 2013 yilgacha «Barselona» safida birgalikda to‘p surishgan.

«Men Messini eng zo‘ri deb hisoblayman. Buni doim aytganman va minglab videoroliklar mening fikrimni tasdiqlaydi. «Barselona»ga o‘tganimdan so‘ng va uni har kuni mashg‘ulotlarda ko‘ra boshlaganimda, unga bo‘lgan hayratim uch barobarga ortdi.

Men hali ham Viktor Valdesga aytgan gaplarimni eslayman: «Messi agar qachondir darvozabon bo‘lishni istasa, sening o‘rningni bemalol egallaydi». Ba’zan u yarim himoyaga tushib, Xavi va Inyestadan ham yaxshiroq o‘ynashi mumkin edi. Bu aql bovar qilmas darajada», — deya Inter Miami News Hub Vilyaning so‘zlarini keltirmoqda.

Lionel Messi 2023 yildan buyon «Inter Mayami» sharafini himoya qilib kelmoqda.