Испаниялик собиқ ҳужумчи Давид Вилья Лионель Месси ҳақида нималар деб ўйлашини сўзлаб берди.
Испаниялик ва аргентиналик футболчилар 2010 йилдан 2013 йилгача «Барселона» сафида биргаликда тўп суришган.
«Мен Мессини энг зўри деб ҳисоблайман. Буни доим айтганман ва минглаб видеороликлар менинг фикримни тасдиқлайди. «Барселона»га ўтганимдан сўнг ва уни ҳар куни машғулотларда кўра бошлаганимда, унга бўлган ҳайратим уч баробарга ортди.
Мен ҳали ҳам Виктор Вальдесга айтган гапларимни эслайман: «Месси агар қачондир дарвозабон бўлишни истаса, сенинг ўрнингни бемалол эгаллайди». Баъзан у ярим ҳимояга тушиб, Хави ва Иньестадан ҳам яхшироқ ўйнаши мумкин эди. Бу ақл бовар қилмас даражада», — дея Inter Miami News Hub Вильянинг сўзларини келтирмоқда.
Лионель Месси 2023 йилдан буён «Интер Майами» шарафини ҳимоя қилиб келмоқда.
