Ўзбекистон Суперлигасида 20-тур учрашувлари тўлиқ якунланди. 5 сентябрь куни турнинг сўнгги учта баҳси ўтказилди.

"Сўғдиёна" ўз майдонида "Машъал"ни 5:2 ҳисобида мағлуб этиб, йирик ғалабани қўлга киритди. "Қўқон-1912" ва "Динамо" ўртасидаги баҳсда эса ғолиб аниқланмади — 1:1. Куннинг сўнгги учрашувида "Қизилқум" "Бухоро"дан 3:2 ҳисобида устун келди.

Шу тариқа, 20-турдаги саккизта учрашувда жами 26 та гол урилди. Энг сермаҳсул баҳс Қаршида кузатилди — "Насаф" чемпионат пешқадами "Нефтчи"ни 6:2 ҳисобида мағлуб этди. "Пахтакор" эса "Андижон" устидан 3:0 ҳисобида ишончли ғалаба қозонди.

Тур якунларига кўра, "Нефтчи" 45 очко билан пешқадамликни сақлаб қолди. "Пахтакор" 43 очко билан иккинчи, "Навбаҳор" эса 38 очко билан учинчи ўринда. "Бухоро" мағлубиятга қарамай 34 очко билан 4-поғонада қолди.

"Сўғдиёна" йирик ғалабадан кейин 27 очко жамғариб, 10-ўринга кўтарилди. "Қизилқум" эса очколари сонини 26 тага етказиб, 11-поғонани эгаллади. "Қўқон-1912" 20 очко билан 13-ўринда, бор-йўғи 4 очкога эга "Машъал" эса сўнгги поғонада қолмоқда.