Saudiyaning «An-Nasr» klubi bosh murabbiyi Jorje Jezush portugaliyalik hujumchi Krishtianu Ronalduning sog‘lig‘i haqida ma’lumot berdi. Hujumchi «Al-Feyha»ga qarshi o‘yinda (3:1) jarohat olgan edi. Avvaliga manbalar Ronaldu ikki haftadan to‘rt haftagacha maydonga tusha olmasligini ta’kidlashayotgan edi.

«Oxirgi o‘yinda u mushaklaridagi og‘riq tufayli maydonni tark etdi. Tekshiruvlardan so‘ng jarohat kutilganidan ko‘ra jiddiyroq ekani, dam olish va tiklanish jarayoni zarurligi ma’lum bo‘ldi. Krishtianu Ispaniyaga yo‘l oldi. Jarohat Madridda, u bilan doimiy ishlaydigan mutaxassis nazoratida davolanishni talab etadi. U tez orada safga qaytadi va jamoaga yordam beradi, deb umid qilamiz», — deya Jezushning so‘zlarini keltirmoqda A Bola.

Ronaldu 2023 yildan beri «An-Nasr» sharafini himoya qilmoqda. Ushbu mavsumda hujumchi Saudiya Arabistoni chempionatida 22 ta o‘yin o‘tkazib, 21 ta gol urdi va 2 ta golli uzatmani amalga oshirdi.