Саудиянинг «Ан-Наср» клуби бош мураббийи Жорже Жезуш португалиялик ҳужумчи Криштиану Роналдунинг соғлиғи ҳақида маълумот берди. Ҳужумчи «Ал-Фейҳа»га қарши ўйинда (3:1) жароҳат олган эди. Аввалига манбалар Роналду икки ҳафтадан тўрт ҳафтагача майдонга туша олмаслигини таъкидлашаётган эди.
«Охирги ўйинда у мушакларидаги оғриқ туфайли майдонни тарк этди. Текширувлардан сўнг жароҳат кутилганидан кўра жиддийроқ экани, дам олиш ва тикланиш жараёни зарурлиги маълум бўлди. Криштиану Испанияга йўл олди. Жароҳат Мадридда, у билан доимий ишлайдиган мутахассис назоратида даволанишни талаб этади. У тез орада сафга қайтади ва жамоага ёрдам беради, деб умид қиламиз», — дея Жезушнинг сўзларини келтирмоқда A Bola.
Роналду 2023 йилдан бери «Ан-Наср» шарафини ҳимоя қилмоқда. Ушбу мавсумда ҳужумчи Саудия Арабистони чемпионатида 22 та ўйин ўтказиб, 21 та гол урди ва 2 та голли узатмани амалга оширди.
