«Manchester Siti» rahbariyati jamoaning hujumkor yarim himoyachisi Fil Foden bilan mehnat shartnomasini uzaytirish istagida. Bu haqda «The Athletic» nashri xabar bermoqda.

Manbaning ta’kidlashicha, «shaharliklar» o‘z tarbiyalanuvchisini tarkibda saqlab qolishni xohlashadi. Biroq 25 yoshli yarim himoyachining o‘yinida barqarorlik yo‘qligini inobatga olsak, muzokaralar oson kechishi dargumon ekani qayd etilgan.

Joriy mavsumda Foden barcha turnirlarni hisobga olgan holda 38 ta o‘yinda ishtirok etdi. U o‘z hisobiga o‘nta gol va beshta golli uzatmani yozdirib qo‘ygan.

Fodenning «Manchester Siti» bilan amaldagi shartnomasi 2027 yilning yozida yakuniga etadi. «Transfermarkt» ekspertlari futbolchining qiymatini 80 million yevroga baholamoqdalar.