«Yuventus» hujumchisi Kenan Yildiz A Seriyaning shanba kungi «Piza»ga qarshi bahsi (4:0) qahramonlaridan biriga aylandi.
20 yoshli futbolchi 54-daqiqada Andrea Kambyasoga golli uzatma berdi, 75-daqiqada esa o‘z ismini tabloga yozdirib qo‘ydi. Endilikda turkiyalik futbolchining A Seriya joriy mavsumidagi hisobida 9 ta gol va 5 ta golli uzatma mavjud. Opta ma’lumotlariga ko‘ra, bungacha Yevropaning kuchli beshlik chempionatlarida faqat ikki nafar 20 yoshgacha bo‘lgan futbolchi 5 ta gol va 5 ta assist ko‘rsatkichidan o‘ta olgan edi. Bular — «Barselona»dan Lamin Yamal va «RB Leypsig»dan Yan Diomandedir.
Kenan Yildiz ayni damda A Seriya to‘purarlar poygasida ikkinchi o‘rinni boshqa besh nafar futbolchi bilan bo‘lishib turibdi.
