«Tottenxem» markaziy himoyachisi Kristian Romero joriy mavsum yakunida klubni tark etishga qaror qildi. 27 yoshli argentinalik futbolchi jamoa rahbariyatini yozgi transfer oynasida jamoasini o‘zgartirish niyati borligi haqida xabardor qilgan. Romeroning ketishi, hatto «Tottenxem» APLdan tushib ketmaslik vazifasini uddalab, UEFA Chempionlar ligasida muvaffaqiyat qozongan taqdirda ham, ortga qaytmas jarayon sifatida ko‘rilmoqda. Bu haqda The Telegraph nashri xabar bermoqda.

Manbaning ta’kidlashicha, «Tottenxem» rahbariyati avvalroq yangi mavsum oldidan tarkibni yangilashni rejalashtirgan edi va Romero ilk yirik sotuvga aylanishi mumkin. Argentinalik himoyachi «shporlar» safiga 2022 yilda «Atalanta»dan 52 million yevro evaziga kelib qo‘shilgan edi. Joriy mavsumda u 28 ta uchrashuvda maydonga tushib, 6 ta gol urdi va 4 ta golli uzatmani amalga oshirdi.

Romeroning «Tottenxem» bilan amaldagi shartnomasi 2029 yilgacha mo‘ljallangan, uning transfer qiymati esa Transfermarkt portali tomonidan 50 million yevroga baholanmoqda.