Madridning "Real" klubi kelasi yozgi transfer oynasida tarkibni tubdan isloh qilish va jamoa qiyofasini yangilashni maqsad qilgan. "Qirollik klubi" rahbariyati tarkibni yanada muvozanatli va raqobatbardosh holatga keltirish uchun katta ko‘lamdagi ishlarni amalga oshirishni rejalashtirmoqda.

Cadena SER nashri tarqatgan ma’lumotlarga qaraganda, madridliklar kelasi mavsum oldidan jami olti nafar yangi ijrochini safga qo‘shib olmoqchi. Rejaga ko‘ra, jamoaning har bir chizig‘i — qanot va markaziy himoya, tayanch hududi, pleymeykerlik roli, shuningdek, o‘ng qanot vingeri va markaziy hujumchi pozisiyalari yangi nomlar bilan kuchaytiriladi.

Yarim himoyadagi yangi yetakchi qidirilmoqda

Ayni damda Madrid klubi uchun eng dolzarb masala — ko‘p yillar davomida jamoa o‘yinini boshqarib kelgan Toni Kroos va Luka Modrich kabi afsonalarning o‘rnini bosa oladigan ijodkor yarim himoyachini topish.

Shu maqsadda "qaymoqranglilar"ning short-listidan "PSJ" a’zosi Vitinya joy olgan. Portugaliyalik futbolchi ayni damda Madrid grandining asosiy transfer nishonlaridan biri bo‘lib turibdi.

Qaytishlar va hujumdagi o‘zgarishlar

Shuningdek, "Real" o‘z tarbiyalanuvchilari va ijaradagi futbolchilariga ham e’tibor qaratmoqda:

• Niko Pas: "Komo" safida porlayotgan iqtidorli yarim himoyachining sobiq klubiga qaytish ehtimoli yuqori baholanmoqda.

• Endrik: Braziliyalik yosh yulduz "Lion"dagi ijara muddatini yakunlab qaytgach, hujum chizig‘idagi raqobatni yanada kuchaytirishi kutilyapti.

Agar ushbu transfer rejalari to‘liq amalga oshsa, "Real Madrid" kelasi mavsumni mutlaqo yangilangan va har tomonlama mustahkamlangan tarkib bilan boshlaydi.