Madridning «Atletiko» klubi sport direktori Mateu Alemani Xulian Alvaresning jamoadan ketishi mumkinligi haqidagi mish-mishlar yuzasidan navbatdagi bor munosabat bildirdi.
«Matraschilar» hujumchisini boshqa klublar bilan bog‘lashda davom etishmoqda. Argentinalik futbolchi uchun asosiy da’vogar sifatida hamon «Barselona» tilga olinmoqda.
«Xulian biz bilan qoladi. Uning shartnomasi bor, u bilan hech qanday muammo yo‘q. Odamlar yo‘q joydan har xil voqealarni to‘qib chiqarishmoqda. Alvares «Atletiko»da baxtli ekanligini ochiq-oydin ta’kidlagan. Biz uning o‘yinidan juda mamnunmiz va u bu yerda hali ko‘p yillar — hatto amaldagi shartnomasida ko‘rsatilganidan ham ko‘proq vaqt qolishiga umid qilamiz», — deya Barca Universal Alemanining so‘zlarini keltiradi.
Xulian Alvaresning «Atletiko» bilan tuzgan mehnat shartnomasi 2030 yilgacha mo‘ljallangan bo‘lib, Transfermarkt portalida uning narxi 100 mln yevro etib belgilangan.
