Angliyaning “Liverpul”, “Arsenal”, “Manchester Siti”, Germaniyaning “Leypsig” va “Borussiya Dortmund” klublari 21 yoshli “Nyukasl” himoyachisi Lyuis Xollni kuzatib bormoqda. Biroq, ushbu klublardan hech biri futbolchiga rasmiy taklif yo‘llamagan. Bu haqda Caught Offside nashri xabar berdi.

Manbaga ko‘ra, “Nyukasl” Xollni sotishni hohlamaydi, ammo klub buni amalga oshirishga qaror qilsa, transfer qiymati 65–70 mln funt sterlingni (taxminan 75–80 mln yevro) tashkil etadi. Shu bilan birga, klub transfer byudjetini boshqa futbolchilarni sotish orqali muvozanatlashni rejalashtirayotgani ta’kidlangan.

Joriy mavsumda himoyachi barcha musobaqalarda 39 ta o‘yinda maydonga tushib, bitta gol va bitta assist qayd etgan. Futbolchining klub bilan amaldagi shartnomasi 2029 yil yoziga qadar amal qiladi. Transfermarkt portalidagi ma’lumotlarga ko‘ra, futbolchining bozor qiymati 35 mln yevroni tashkil qiladi.