Transfermarkt portalining so‘nggi yangilanishiga ko‘ra, Fermin Lopesning bozor qiymati 100 million yevroga yetdi.

«Barselona» yarim himoyachisi murabbiy Xansi Flik qo‘l ostida ajoyib mavsumni o‘tkazmoqda — u 37 ta o‘yinda maydonga tushib, 11 ta gol va 15 ta golli uzatmaga mualliflik qildi.

Ushbu mavsumdagi samarali ko‘rsatkichlaridan so‘ng, futbolchining bahosi 70 million yevrodan 100 million yevroga ko‘tarildi va bu 43 foizlik o‘sishni anglatadi. Bunday ko‘tarilish Ferminni jahon futbolidagi eng qimmat 20 nafar futbolchi qatoriga olib kirdi va uning «Barselona» yarim himoyasidagi roli tobora ortib borayotganini yaqqol ko‘rsatdi.

«Ko‘k-anorranglilar»ning boshqa a’zolarida ham ijobiy o‘sish kuzatildi. Xususan, Mark Bernal jarohatdan so‘ng safga qaytib, asosiy tarkibdan mustahkam o‘rin egallagani bois, uning narxi 10 million yevrodan 30 million yevrogacha ko‘tarildi.

Shu bilan birga, Pedri 150 million yevrolik ko‘rsatkich bilan dunyoning eng qimmatbaho futbolchilari qatorida qolmoqda. U bu borada faqat Lamin Yamal, Erling Xoland va Kilian Mbappedan ortda qolmoqda.