«Manchester Siti» yarim himoyachisi Bernardu Silva so‘nggi yillarda jamoa darajasi pasaygani haqida gapirdi. Portugaliyalik futbolchidan buning sababini aytish so‘raldi.
«Buning eng aniq javobi — o‘tish davri. Agar biz «trebl» (bir mavsumda uchta asosiy sovrin) qayd etgan mavsumga nazar tashlasangiz, o‘sha tarkibdan atigi to‘rt-besh nafar futbolchi qolganini ko‘rasiz. Albatta, har kimning o‘z fikri bo‘lishi mumkin: murabbiyning, mening yoki boshqalarning. Biroq men qisqa vaqt ichida juda ko‘p yangi o‘yinchilarning kelishi jamoaga yordam bermaydi deb hisoblayman. Yosh futbolchilarga moslashish va jamoaviy o‘yinga ko‘nikish uchun vaqt kerak. Lekin bizda bahona yo‘q — yaxshiroq o‘ynashimiz shart», — dedi Silva jurnalistlarga.
Eslatib o‘tamiz, «Manchester Siti» seshanba kuni Chempionlar Ligasi doirasida Madridning «Real» klubini qabul qiladi.
