«Манчестер Сити» ярим ҳимоячиси Бернарду Силва сўнгги йилларда жамоа даражаси пасайгани ҳақида гапирди. Португалиялик футболчидан бунинг сабабини айтиш сўралди.

«Бунинг энг аниқ жавоби — ўтиш даври. Агар биз «требль» (бир мавсумда учта асосий соврин) қайд этган мавсумга назар ташласангиз, ўша таркибдан атиги тўрт-беш нафар футболчи қолганини кўрасиз. Албатта, ҳар кимнинг ўз фикри бўлиши мумкин: мураббийнинг, менинг ёки бошқаларнинг. Бироқ мен қисқа вақт ичида жуда кўп янги ўйинчиларнинг келиши жамоага ёрдам бермайди деб ҳисоблайман. Ёш футболчиларга мослашиш ва жамоавий ўйинга кўникиш учун вақт керак. Лекин бизда баҳона йўқ — яхшироқ ўйнашимиз шарт», — деди Силва журналистларга.

Эслатиб ўтамиз, «Манчестер Сити» сешанба куни Чемпионлар Лигаси доирасида Мадриднинг «Реал» клубини қабул қилади.