"Tottenxem" himoyachisi Mikki van de Ven OAVda tarqalgan, go‘yoki London klubi futbolchilari joriy mavsumda kurashdan voz kechishgani va taslim bo‘lishgani haqidagi mish-mishlarga munosabat bildirdi.

"Futbolchilar bor kuchini berishni to‘xtatgani haqidagi gaplar haqiqatga to‘g‘ri kelmaydi. OAVda o‘yinchilar baribir jamoadan ketishadi, deb yozishmoqda. Bu shunchaki safsata, odamlar esa bunga ishonishmoqda. Yaqinda bir futbolchi jamoaning qolgan a’zolariga: "Baribir ketaman, shuning uchun menga farqi yo‘q", degani haqida o‘qib qoldik... Bu shunchaki uydirma. Muxlislar esa bunga ishonishadi. Bu bizni juda xafa qilmoqda!" — deya van de Venning so‘zlarini keltiradi insayder Fabrisio Romano.

Ayni damda "Tottenxem" Angliya chempionati turnir jadvalida 30 ochko bilan 16-o‘rinda bormoqda. "Shporlar" xavfli hududdan atigi bir ochkoga oldinda.