Ispaniya Kubogi finali uchun «Atletiko» a’zolaridan (sosyos) tushgan arizalar soni belgilangan kvotadan ikki baravardan ko‘proqqa oshib ketdi.
18 aprel kuni Sevilyada bo‘lib o‘tadigan turnir finalida «Atletiko» «Real Sosyedad»ga qarshi bahs olib boradi. Madrid jamoasi 2013 yildan beri ilk bor Ispaniya Kubogi finaliga yo‘l oldi.
«Atletiko» klubi final uchun 54 385 nafar klub a’zosi chipta buyurtma qilganini e’lon qildi. Vaholanki, madridliklar uchun ajratilgan umumiy kvota 25 680 ta o‘rinni tashkil etadi va ularning 85 foizi aynan «sosyos»lar uchun bron qilingan.
Shu tariqa, «Atletiko» a’zolari «Sosyedad» bilan o‘yin uchun 21 828 ta chiptaga ega bo‘ladilar. Yana 1050 ta chipta rasmiy fan-klublar o‘rtasida taqsimlanadi, 160 tasi esa imkoniyati cheklangan a’zolarga topshiriladi. Chiptalar sotuvi 23 mart kuni boshlanishi rejalashtirilgan.
