Braziliya terma jamoasi bosh murabbiyi Karlo Anchelotti «Nyukasl Yunayted» yarim himoyachisi Bruno Gimaraynsning Madridning «Real» klubiga ehtimoliy o‘tishini qo‘llab-quvvatladi. Italiyalik mutaxassis 28 yoshli futbolchi nomzodini «qaymoqranglilar» prezidenti Florentino Peresga tavsiya qildi va bu o‘yinchi ayni damda jamoaga aynan kerak bo‘lgan nomzod ekanligini ta’kidladi. Bu haqda Reuters xabar bermoqda.

Manbaning ma’lumotiga ko‘ra, Anchelotti «Real»da murabbiylik qilgan davridayoq, xususan 2022 yilda, klub Gimaraynsni sotib olishini istagan edi. Italiyalik mutaxassis braziliyalik yarim himoyachida Luka Modrich va Toni Kroosning vorisini ko‘rgan.

Joriy mavsumda Gimarayns barcha turnirlarda 35 ta o‘yinda ishtirok etib, o‘z hisobiga 9 ta gol va 7 ta golli uzatmani yozdirib qo‘ydi. Futbolchining klub bilan amaldagi mehnat shartnomasi 2028 yilning yoziga qadar mo‘ljallangan. Transfermarkt portalida keltirilgan ma’lumotlarga ko‘ra, futbolchining bozor qiymati 75 million yevroni tashkil etadi.