Бразилия терма жамоаси бош мураббийи Карло Анчелотти «Ньюкасл Юнайтед» ярим ҳимоячиси Бруно Гимарайнснинг Мадриднинг «Реал» клубига эҳтимолий ўтишини қўллаб-қувватлади. Италиялик мутахассис 28 ёшли футболчи номзодини «қаймоқранглилар» президенти Флорентино Пересга тавсия қилди ва бу ўйинчи айни дамда жамоага айнан керак бўлган номзод эканлигини таъкидлади. Бу ҳақда Reuters хабар бермоқда.
Манбанинг маълумотига кўра, Анчелотти «Реал»да мураббийлик қилган давридаёқ, хусусан 2022 йилда, клуб Гимарайнсни сотиб олишини истаган эди. Италиялик мутахассис бразилиялик ярим ҳимоячида Лука Модрич ва Тони Крооснинг ворисини кўрган.
Жорий мавсумда Гимарайнс барча турнирларда 35 та ўйинда иштирок этиб, ўз ҳисобига 9 та гол ва 7 та голли узатмани ёздириб қўйди. Футболчининг клуб билан амалдаги меҳнат шартномаси 2028 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор қиймати 75 миллион еврони ташкил этади.
