Madridning «Real» klubi 18 yoshli o‘ng qanot himoyachisi Xesus Fortea Alvaro Arbeloa qo‘l ostida asosiy jamoada debyut qiladigan navbatdagi futbolchiga aylanishi mumkin.
«Qaymoqranglilar»ning amaldagi ustozi «Kastilya»dagi birgalikdagi faoliyati orqali o‘ziga yaxshi tanish bo‘lgan yosh futbolchilarga mamnuniyat bilan ishonch bildirmoqda. Marca nashrining xabariga ko‘ra, Fortea «qirollik klubi»ning istiqbolli tarbiyalanuvchilari orasida asosiy tarkibda tez orada debyut qilishi kutilayotgan bosh nomzodlardan biri hisoblanadi. Lateral o‘tgan yilning yozidayoq Klublar o‘rtasidagi jahon chempionatida jamoa qaydnomasiga kiritilgan edi, biroq maydonga tushmagan.
Xesus Fortea Ispaniyaning 15 yoshdan 20 yoshgacha bo‘lgan barcha toifadagi terma jamoalarida o‘ynash tajribasiga ega. Himoyachining «Real» bilan shartnomasi 2029 yilgacha mo‘ljallangan.
Yakshanba kuni Alvaro Arbeloa jamoasi o‘z maydonida «Atletiko»ni qabul qiladi.
